دل کبھی صورت حالات سے باہر نہ گیا
میں محبت میں بھی اوقات سے باہر نہ گیا
بات سوچی نہ کوئی تیری بات سے پہلے
تذکرہ کوئی بھی تیری ذات سے باہر نہ گیا
اِک تو کہ تیرا تعلق ہے جہاں بھر سے
اِک میں جو کبھی تیری ذات سے باہر نہ گیا
معاملہ آپہنچا ہے جُدائی کا مگر
میں پہلی ہی ملاقات سے باہر نہ گیا
کوئی بھی اختیار اچھا بُرا چلنے نہیں دیتا
وہ سب کچھ کر رہا اور پتہ چلنے نہیں دیتا
اندھیرا بھی ہے ، پتوں پر پسینہ بھی مگر اُس نے
سحر روکی ہوئی ہے اور ہوا چلنے نہیں دیتا
کبھی اٹھوا رہا ہے سارا سودا ہی دکانوں سے
کبھی بازار میں سکہ مرا چلنے نہیں دیتا
وہاں درپیش ہے سارے سمندر کا سفر ہم کو
سفینے کو جہاں خود ناخدا چلنے نہیں دیتا
ہمارے ہاتھ ہی اُس نے نہیں باندھے ہوئے وہ تو
کسی کی بھی یہاں اپنے سوا چلنے نہیں دیتا
کھڑا ہوں اور مرے آگے رکاوٹ بھی نہیں کوئی
جو سچ پوچھیں تو مجھ کو راستہ چلنے نہیں دیتا
تیری مشکل نہ بڑھاؤں گا ، چلا جاؤں گا
اشک پلکوں میں چھپاؤں گا ، چلا جاؤں گا
مدت بعد آیا ہوں پرانے گھر میں
خود کو جی بھر کے رُلاؤں گا ، چلا جاؤں گا
اِن گلیوں سے تو مجھکو نہیں لینا کچھ بھی
بس تمہیں دیکھنے آؤں گا ، چلا جاؤں گا
کچھ دیر دہلیز پہ اپنی پڑا رہنے دو
جیسے ہی ہوش میں آؤں گا ، چلا جاؤں گا
یہ جنگ نہیں جیتنی مجھے اپنے لئے
تخت پہ تم کو بٹھاؤں گا ، چلا جاؤں گا
وہ عکس بن کے میری چشمِ تر میں رہتا ہے
عجیب شخص ہے ، پانی کے گھر میں رہتا ہے
وہی تو میری شبِ غم کا ایک پیامبر ہے
وہ ایک ستارہ جو چشمِ سحر میں رہتا ہے
جو میرے ہونٹوں پہ آئے تو گنگناؤں اُسے
وہ شعر بن کے بیاض نظر میں رہتا ہے
گزرتا وقت میرا غم گسار کیا ہوگا
وہ خود تعاقب شام و سحر میں رہتا ہے
میرا ہی رُوپ ہے تُو غور سے اگر دیکھے
بگولہ سا جو تیری راہ گزر میں رہتا ہے
وہ کون ہے جس کی تلاش میں بسمل
ہر ایک سانس میرا اب سفر میں رہتا ہے
جو بس میں ہے وہ کرجانا ضروری ہوگیا ہے
تیری چاہت میں مَر جانا ضروری ہوگیا ہے
درختوں پر پرندے لوٹ آنا چاہتے ہیں
خزاں رُت کا گزر جانا ضروری ہوگیا ہے
ہمیں تو کسی اگلی محبت کے سفر میں
نہیں جانا تھا پر جانا ضروری ہوگیا ہے
مَیں تجھے اپنے ہر دُکھ سے بچانا چاہتا ہوں
تیرے دل سے اُتر جانا ضروری ہوگیا ہے
وہ جو شوق تھے جو تھے ولولے ، سبھی بجھ گئے سبھی مَر گئے
میرے عشق کے کئی سلسلے ، سبھی بجھ گئے سبھی مَر گئے
وہ چاند دل میں اُجالنا ، وہ کمند تاروں پہ ڈالنا
وہ کمال کے میرے حوصلے ، سبھی بجھ گئے سبھی مَر گئے
وہ جو گیسوؤں کی بہار تھی ، وہ جو آنچلوں کی قطار تھی
وہ جو جگنوؤں کے تھے قافلے ، سبھی بجھ گئے سبھی مَر گئے
جو تھا اِک اظہر خوش ندا ، وہ جو بات کہتا تھا بَر ملا
وہ جو اُس کے ہوتے تھے طنطنے سبھی بجھ گئے سبھی مَر گئے
